شاره‌وانی سلێمانی: هەندێك فەرمانبەر ئامادە نییە پارەی تاپۆكردنی خانووە زیادەڕۆكان بدەن

2024-06-06

موڵك نیوز

شاره‌وانی سلێمانی رایگەیاند، تێگه‌یشتنێكی هه‌ڵه‌ هه‌یه‌ بۆ تاپۆكردنی خانووه‌ زیاده‌ڕۆكان و هەندێك فەرمانبەر ئامادە نییە پارەی تاپۆكردنی خانووە زیادەڕۆكان بدەن.

سه‌رۆكایه‌تی شاره‌وانی سلێمانی راگەیەنراوێكی بڵاوكردۆتەوەو تیایدا هاتووە، تێگه‌یشتنێكی هه‌ڵه‌ هه‌یه‌ بۆ تاپۆكردنی خانووه‌ زیاده‌ڕۆكان كه‌ به‌پێی یاسای (ژماره‌ 3 ساڵی 2019 هه‌مواركراو) ئه‌نجامده‌درێت به‌وه‌ی هه‌ندێك له‌ فه‌رمانبه‌ران ئاماده‌نین پاره‌ی تاپۆكردنی خانووه‌ زیاده‌ڕۆكان بده‌ن به‌ شاره‌وانی گوایه‌ به‌هۆی ئه‌وه‌وه‌ به‌ سودمه‌ند داده‌نرێن و دواتر ناتوانن زه‌وی وه‌ربگرن.

لە راگەیەنراوەكەدا ئەوەش هاتووە، سودمه‌ندبوون به‌هۆی ئه‌و یاسایه‌وه‌ سنوورێكی زۆر ته‌سكی هه‌یه‌ و ته‌نها له‌م سێ دۆخه‌ی خواره‌وه‌دا به‌هۆی تاپۆكردنی خانوی زیاده‌ڕۆوه‌ به‌ سودمه‌ند داده‌نرێت.

یه‌كه‌م: ئه‌گه‌ر خانووه‌كه‌ به‌بێ به‌رامبه‌ر تاپۆ بكرێت.

دووه‌م: ئه‌گه‌ر خانوه‌كه‌ پاش جیاكردنه‌وه‌ی زه‌وییه‌كه‌ دروستكرابێت، واته‌ ئه‌گه‌ر خانوه‌كه‌ به‌ رێژه‌ی ٪25ی به‌های زه‌وییه‌كه‌ تاپۆ بكرێت.

سێیه‌م: ئه‌گه‌ر روبه‌ری تاپۆكراو له‌ 200 مه‌تری چوارگۆشه‌ زیاتر بێت، به‌ڵام خانوه‌كانی سنوری تاسڵوجه‌ و عه‌ربه‌ت هه‌تا 300 مه‌تریش به‌ سودمه‌ند دانانرێن.