زانیاری نوێ لەسەر قەرەبووکردنەوەی هاوڵاتیانی گەڕەکی گرد جوتیار

2024-06-06

هاوڵاتیانی گەڕەكی گرد جوتیاری لە هەولێر ئەوانەی زەوییەكانیان بەر پرۆژەی حكومەت كەوتوون قەرەبوو دەكرێنەوە، موڵك نیوز زانیاری لەسەر شوێنی قەرەبوو كردنەوەكە ئاشكرا دەكات.

سەرۆکایەتی شارەوانی هەولێر ئاگادارییەکی بڵاویکردەوەو رایگەیاند، ئاگاداری خاوەن پارچە زەوییەکانی ژمارە 15 تاوەکو 1150 و 2571 تاوەکو 3498 لە کەرتی گردجوتیار دەکەینەوە سەردانی سەرۆکایەتی شارەوانی هەولێر بکەن بە مەبەستی تەواوکردنی ڕێکارەکانی تایبەت بە خۆماڵەکردنی موڵکەکانیان و قەرەبوو کردنەوەیان.

ڕەوەند سەدرەدین خاوەنی كۆمپانیای عەقاراتی هۆپ زۆن بە موڵك نیوزی راگەیاند، ماوەی مانگێكە هاوڵاتیانی گەڕەكی گرد جوتیار لە قەرەكردنەوەیان ئاگادار كراوەنەتەوە، هۆكاری قەرەبووكردنەوەكە ئەوەیە زەوی ئەو هاوڵاتیانە بەر پرۆژەی حكومەت دەكەوێت.

ئاماژەی بەوەشكرد، شوێنی قەرەبوو كردنەوەكە هەر دەكەوێتە سەر شەقامی 150 مەتری، بڕیارە حكومەتی هەرێمی كوردستان تەواوی خزمەتگوزارییەكانیان بۆ دابین بكاتەوە.

ڕەوەند سەدرەدین ئەوەشی وت، قەرەبوو كردنەوەی ئەو هاوڵاتیانە جموجوڵ زیاتر دەكات و نرخەكانیش بەرز دەكاتەوە.

لەسەر نرخی زەوی لە گەڕەكی گرد جوتیار خاوەنی كۆمپانیای عەقارات هۆپ زۆن روونیكردەوە، زەوییەكان 250 مەترین، نرخەكانیان لە 47 هەزار دۆلارەوە دەستپێدەكات.