كۆڕەو لە قەزای چەمچەماڵ ڕوودەدات و بەردەوام نرخی موڵك دادەبەزێت

2024-06-14

لەبارەی ئاوی خواردنەوە لە قەزای چەمچەماڵ و كاریگەری لەسەر بازاڕی خانووبەرە، خاوەنی كۆمپانیایەكی عەقارات دۆخەكە بە كۆڕەو وەسف دەكات و دەڵێت: موڵك لە قەزای چەمچەماڵ بە ڕێژەیەكی زۆر دابەزیوە، دەشڵێت: لە كوێی دونیادا هەیە، 200 مەتر زەوی تاپۆ نرخەكەی 4 هەزار دۆلار بێ.

فریاد رەشید خاوەنی كۆمپانیای عەقاراتی فریال لە چەمچەماڵ بە موڵك نیوزی راگەیاند، ئاوی خواردنەوە لە قەزای چەمچەماڵ زۆر خراپە، هەمووی بەڵێن دەدات و چارەسەر ناكرێت، ئەمە كاریگەری زۆر خراپی لەسەر بازاڕی خانووبەرە دروست كردووە، خەڵكی خانووەكانیان دەفرۆشن و دەچنە شارەكانی دیكە بە تایبەت سلێمانی نیشتەجێ دەبن، ئەوەی ڕوودەدات لەم قەزایە كۆڕەوە.

ئاماژە بەوەشكرد، بازاڕی عەقارات لە چەمچەماڵ زۆربەی فرۆشتنە، ئەمەش وایكردووە نرخی موڵك زۆر دابەزێت، بەشێوەك ئەگەر موڵكێك لە ساڵی 2012 نرخی 80 هەزار دۆلار بێت، ئێستا 50 هەزار دۆلار دەكات.

فریاد رەشید ئەوەشی وت، جگە لە ئاو دۆخی خزمەتگوزارییەكانیش لە قەزای چەمچەماڵ خراپە، چەند ساڵە باوەڕ ناكەم 100 مەتر شەقام لەم شارەدا كرابێت، بۆ نمونە گەڕەكی مامۆستایان كە جوانترین گەڕەك و ناوەندی شارە كەچی تا ئێستا كۆڵانەكانی قیرتاو نەكراوە، 17 ساڵە دروست كراوە ئەم گەڕەكە.

فریاد ئاماژە بە هەرزانی نرخی زەوی لە قەزای چەمچەماڵ دەكات كە لە دونیا هاوشێوەی نیەو دەڵێت: زەوی دابەشكراوە كەچی هیچ خزمەتگوزارییەكی بۆ جێبەجێ ناكرێت، لە كوێی دنیادا هەیە، 200 مەتر زەوی تاپۆ نرخەكەی 4 هەزار دۆلار بێ، كەچی لێرە هەیە، 8 هەزار پارچە زەوی هەیەو خزمەتگوزاری پێ ناگات بۆ ئەوەی خەڵكی بیكاتە خانوو.

ئەوەشی وت، خانووی كرێ لە چەمچەماڵ كەمەو دەست ناكەوێت، چونكە خەڵكی خانووەكەی دەفرۆشێت ئامادە نیە بە نرخێكی كەم بیداتە كرێ، خانوویەكی 200 مەتری كامل كرێی مانگانەی 150 هەزار دینارە.

لەبارەی خراپترین گەڕەك كە كێشەی ئاوی هەبێت و كاریگەری زۆری لەسەر نرخەكەی دروست كردبێت، خاوەنی كۆمپانیای عەقاراتی فریال وتی، گەڕەكێكی وەكو ئاسودە بەس ئاسودە نین، كەسوكاری ئەنفال تێدا نیشتەجێن، خراپترن گەڕەكە بۆ ئاوی خواردنەوە، بۆیە هەرزانترین نرخی موڵكی هەیە، بۆ نمونە بەشی سەرەوەی خانوویەكی كامل 200 مەتری بە 30 هەزار دۆلار دەكریت، بەشی خوارەوەی بە 40 هەزار دۆلارە.