پێنج گرانترین و هەرزانترین خانووبەرەی گەڕەكەكانی هەڵەبجە

2024-06-30

موڵك نیوز گرانترین و هەرزانترین نرخی خانوبەرە لە پێنج گەڕەكی هەڵەبجە ئاشكرا دەكات، خاوەنی نوسینگەیەكی عەقارات دەڵێت، بەرزترین نرخی خانوو لە شارەكە لە رووبەری 200 مەتری 150 هەزار دۆلارە.

حاجی فەیسەڵ حەمە غەریب، خاوەنی نوسینگەی عەقاراتی نما لە سەنتەری شاری هەڵەبجە بە موڵك نیوزی راگەیاند، گرانترین گەڕەكی شاری هەڵەبجە ئەمانەن " مامۆستایان ، ئەندازیاران ، بەختیاری ، سەرا ، مەرزە بۆتۆ ". 

ئاماژەی بەوەشكرد، بەرزترین نرخی خانوو لەم گەڕەكە، خانووی رووبەر 200 مەتری ئێستا هەیە داوای 150 هەزار دۆلار دەكات، نرخی زەوی نیشتەجێبوون لەم گەڕەكە تا 40 هەزار دۆلار دەچێت.

لەبارەی پێنج هەرزانترین گەڕەكی هەڵەبجە، حاجی فەیسەڵ وتی، " شەید فاتیح ، شارەوانی بەشی خوارەوە ، شەهیدان نزیك پاركەكە ، زەمەقی ، زەمەقی كانی ئاشكان" هەرزانتر گەڕەكەكانی هەڵەبجەن، ئەمانە نرخیان گونجاو و هەرزانە.

وتیشی، هەرزاترین خانوو لەم گەڕەكانە بە 15 هەزار دۆلارە، بەو نرخە لە گەڕەكی شەهید فاتیحە، زەویش بە 8 هەزار دۆلار هەیە.

سەبارەت بە دۆخی بازاڕی خانووبەرەو كڕین و فرۆشتن، خاوەنی نوسینگەی عەقاراتی نما ئاماژەی بەوەكرد، وەكو تەواوی هەرێمی كوردستان لە هەڵەبجەش بازاڕ لاوازە، بەڵام بەشی خۆی جموجوڵ هەیە، كڕین و فرۆشتن زیاتر لە زەوی و خانووی هەرزانە.