نوسینگەیەكی عەقارات: هەرزانترین خانوو لە گەڕەكی شاوێس 30 هەزار دۆلارە

2024-07-06

نووسینگەیەکی عەقارات لە هەولێر، وردەكاری كەمترین و بەرزترین نرخی خانوو و زەوی لە گەڕەکی شاوێس دەخاتەڕوو و رایدەگەیەنێت: لە چاو گەڕەكانی دیكەی هەولێر لێرە بازاڕ باشترەو بەرزترین نرخی خانوو دەگاتە 95 هەزار دۆلار.

زیاد محەمەد، خاوەنی نووسینگەی عەقاراتی شاردین لە هەولێر، بە موڵک نیوزی ڕاگەیاند، نرخی خانوو و زەوی نیشتەجێبوون بە پێی شوێنەكانی گەڕەكەكە دەگۆڕێت، هەرزانترین خانوو نرخەكەی 30 هەزار دۆلارە، گرانترینش نرخەكەی تاوەكو 95 هەزار دۆلار دەڕوات.

بەهۆی فروانبوونی بەرچاوی گەڕەكی شاوێس لە شاری هەولێر، گەڕەكەكە گەڕەكی دیكەی لیبۆتەوەو ناوی لێ نراوە، شوێنەكەی دەكەوێتە سەر شەقامی سەرەكی پیرمام.

ئاماژەی بەوەشكرد، گەڕەكەكانی بەهاری نوێ و شاوێسی نوێ گرنترین موڵكەكانی نیشتەجێبوونی تێدایە، لەم دوو شوێنە نرخی زەوییەكی 125 مەتری تاپۆ لە 35 هەزار دۆلار دەستپێدەکات بۆ 50 هەزار دۆلار، نرخی خانوو لە 75 هەزار دۆلار دەستپێدەکات بۆ 95 هەزار دۆلار. 

ئەوەشی وت، جموجۆڵی بازاڕی كڕین و فرۆشتنی زەوی و خانوو زیاتر لە گەڕەكی بەهاری نوێیە کە لەگەڵ گەڕەكی هەولێری نوێ تێکەڵ بووە، وتیشی: لە شوێنی مامناوەندی گەڕەكی شاوێس، زەوی تاپۆ رووبەری 100 مەتری نرخەكەی 25 هەزار دۆلارە.

لەبارەی نرخی شوێنە هەرزانەكانی گەڕەكی شاوێس، خاوەنی نووسینگەی عەقاراتی شاردین وتی، گەڕەكی سەفین هەزانترین گەڕەكی شاوێسە، چونکە لە ڕابردوودا خەڵک خانوویان لەم گەڕەكە بە تەجاوز درووستکردووە، لێرە نرخی خانوویەكی 100 مەتری بە 30 هەزار دۆلار بەردەستە، بەڵام زەوی کەمە. 

وتیشی، شەقامی پشت ئەنجوومەنی سەرکردایەتی و گراند ماجیدی مۆڵ، گەڕەکی خەیلانی ئەمانە هەرچەند تاپۆ نیە بەڵام خواستی باشیان لەسەرە، بە گشتی لە گەڕەكی شاوێس کڕین و فرۆشتن باشترە لە چاو گەڕەكەكانی دیكەی هەولێر.

زیاد محەمەد ئاماژەی بەوەشكرد، بە گشتی دۆخی ئاو لە گەڕەكی شاوێس باشە، لە چەند شوێنێكی كەم كێشەی ئاو هەیە، ئەویش هیچ کێشەیەکی بۆ دابەزین و بەرزبوونەوەی نرخی خانووبەرە دروستنەکردوە.