پێنج هەرزانترین و گرانترین نرخی خانووبەرەی گەڕەكەكانی رانیە

2024-07-11

خاوەنی عەقاراتێك لە رانیە، پێنج گرانترین و هەرزانترین نرخی خانووبەرە لە قەزاكە دەخاتەڕوو و رایدەگەیەنێت: بازاڕی كڕین و فرۆشتنی خانووبەرە مام ناوەندە، بەڵام نرخەكان بەردەوام بەرز دەبێتەوەو بەرەو سەرەوەیە.

دڵدار وەرتی، خاوەنی عەقاراتی دڵدار وەرتی لە رانیە، بە موڵك نیوزی راگەیاند، قەزای ڕانیە 48 گەڕەك لە خۆ دەگرێت، پێنج گرانترین گەڕەكی قەزاكە " نەورۆز ،  رووناكی ، بنار ، چوارچرا ، داستان "ە، گرانترن نرخی خانوو لەم گەڕەكانە بە رووبەری 200 مەتری دووجا نرخەكەی تاوەكو 200 هەزار دۆلار دەچێت، ئەمە بۆ شوێنی نیشتەجێبوون، شوێنی بازرگانی زۆر زیاترە 500 هەزار دۆلارە، نرخی زەوی لەو پێنج گەڕەكە سەرووی 100 هەزار دۆلارە، رووبەری 200 مەتری.

سەبارەت بە پێنج هەرزانترین خانووبەرەی گەڕەكانی رانیەو نرحەكەی، ئاماژەی بەوەشكرد، هەرزانترین خانوو و زەوی لە گەڕەكی " مەشخەڵ "ە، نرخی زەوی لەم گەڕەكە رووبەری 200 مەتر نرخەكەی 17 هەزار دۆلارە، لە دوای ئەوەش هەرزانترین گەڕەكەكان " چیا ، میدیا ، هاوكاری ، گزنگ "ە، زەوییەكانی ئەم گەڕەكانە مۆڵەتی دروستكردنی خانووی هەیەو تاپۆن، بەڵام خزمەتگوزاری پێنەگەیشتووە بۆیە نرخەكەی هەرزانە.

دڵدار وەرتی، ئەوەشی وت، لە سنوری رانیە هیچ پرۆژەیەكی نیشتەجێبوون لە قۆناغی جێبەجێكردندا نیە، تەنها یەك پرۆژەی نیشتەجێبوون لە قەزاكە هەیە " رۆژ ستی "، ئەویش كۆنە، نرخی خانوو لەم پرۆژەیە لە 40 هەزار دۆلارەوە دەستپێدەكات تاوەكو 70 هەزار دۆلار.

سەبارەت بە دۆخی بازاڕی خانووبەرە، وتی، ئێستا بازاڕی كڕین و فرۆشتنی خانووبەرە مام ناوەندە، پێشتر زۆر باشتر بوو، بەڵام نرخەكان بەردەوام بەرز دەبێتەوەو بەرەو سەرەوەیە.