خاوەنی عەقاراتێك: نرخی خانوو لە گەڕەكی ژینی هەولێر 16 بۆ 45 هەزار دۆلارە

2024-07-13

خاوەنی عەقاراتێك لە گەڕەكی ژینی شاری هەولێر، نرخی خانوو و زەوی لە گەڕەكەکە دەخاتەڕوو و رایدەگەیەنێت: بازاڕی عەقارات لە گەڕەكی  ژین سستە، ماوەیەكی زۆرە بازاڕ ئاوایە، بەڵام ماوەی مانگێكە خراپتر بووە.

هەندرێن نوری، كە خاوەنی نوسینگە عەقاراتە لە گەڕەكی ژین، بە موڵك نیوزی راگەیاند،  خەڵكی زیاتر ئەو زەوییانە دەكڕین كە مۆڵەتی دروستكردنی خانوویان هەیە، ئەو شتانە نەماوە كە پێشتر خەڵكی زەوییان دەكڕی بۆ ئەوەی لە داهاتوودا قازانجی لێ بكەن، ئەو زەوییانەی مۆڵەتی دروستكردنی خانوویان هەیە، بە رووبەری 150 مەتری، نرخیان لە 16 هەزار دۆلارەوە دەستپێدەكات بۆ 45 هەزار دۆلار.

ئاماژەی بەوەشكرد، نرخی خانوو لە گەڕەكی ژین، رووبەری 150 مەتری یەك نهۆم و بەیتونە لە 45 هەزار دۆلارەوە دەستپێدەكات تاوەكو 90 هەزار دۆلار دەچێت، رووبەری 100 مەتریش دانە دانە هەیە، نرخیان لە 30 بۆ 40 هەزار دۆلارە، ئەوانەی نرخیان هەرزانە هیچ خزمەتگوزارییەكی نیە.

سەبارەت بە پرۆژەی جوتسایدی پێكەوە بەستنی گەڕەكی ژین و باغەمرە كە ئێستا لە قۆناغی جێبەجێكردندایە و كاریگەری لەسەر نرخی خانووبەرە، هەندرێن نوری وتی، لە ئێستادا كاریگەرییەكی زۆر كەمی لەسەر نرخی زەوی هەبووە، بەڵام بەڕای من لە داهاتوودا كاریگەری باشی دەبێت ئەگەر پرۆژەكە بە خێرایی و ڕێكی جێبەجێ بكرێت.

بازاڕی عەقارات لە گەڕەكی ژین سستە، ماوەیەكی زۆرە بازاڕ ئاوایە، بەڵام ماوەی مانگێكە خراپتر بووە، فرۆشتن تاك تاكە، بەشێوەیەك پێشتر ئەگەر لە هەفتەیەكدا دوو گرێبەستمان بكردایە، ئێستا بە دوو هەفتە جارێك گرێبەستێك دەكەین، هەندرێن نوری وای وت.