خاوەنی عەقاراتێك: جوتساید كردنی ڕێگای گەزنە كاریگەری لەسەر نرخی خانووبەرە نابێت

2024-07-14

خاوەنی نوسینگەیەكی عەقارات، لەگەڵ ئاماژە كردن بە خراپی بازاڕی خانووبەرە لە گوندی گەزنەی شاری هەولێر، دەڵێت، پرۆژەی جوتساید كردنی ڕێگای گەزنە كاریگەری لەسەر نرخی خانوو و زەوی نابێت.

ئەسعەد محەمەد، خاوەنی نوسینگەی عەقارات، بە موڵك نیوزی راگەیاند، بازاڕی كڕین و فرۆشتن باش نیە، نرخ دابەزیوەو موشتەری كەمە، نزیكەی دوو مانگە بازاڕ ئاوایە، ئەگەر ساڵێك لەمەوبەر خانوویەك نرخەكەی 30 هەزار دۆلار بووبێت، ئێستا نرخەكەی دابەزیوە بۆ 25 هەزار دۆلار، هەرچەند ئەوەش بەپێی شوێنەكان دەگۆڕێت.

ئاماژەی بەوەشكرد، گرانترین خانوو و زەوی لە گوندی گەزنە، ئەوانەن كە دەكەونە پێشەوە، سەر شەقامی سەرەكی، ئەوانەی كە دەكەونە كۆتاییەوە هەرزانن، گرانترین خانوو بە رووبەری 250 مەتر دووجا، نرخەكەی دەگاتە 70 هەزار دۆلار، خانووی هەرزانیش هەیە نرخەكەی لە نێوان 20 بۆ 30 هەزار دۆلارە.

ئەسعەد محەمەد، ئەوەشی وت، نرخی زەویش لە 8 هەزار دۆلارەوە دەستپێدەكات بۆ 20 هەزار دۆلار، بەپێی شوێنی زەوییەكەو رووبەرەكەی، بازاڕی خانوو و زەوی لێرە وەكو یەكە هەردووكیان لاوازە.

بەپێی راگەیەنراوی سەرۆكایەتی شارەوانی هەولێر، پرۆژەی جوتساید كردنی ڕێگای هەولێر ـ گەزنە، بڕیارە لە 13/7/2024 بچێتە بواری جێبەجێكردنەوە

لەبارەی كاریگەری پرۆژەكە، لەسەر نرخی خانوو و زەوی، ئەسعەد محەمەد خاوەنی نوسینگەی عەقارات وتی، باوەڕ ناكەم هیچ كاریگەرییەك لەسەر نرخ دروست بكات، نرخی خانووبەرە پەیوەندی بە دۆخەكەوە هەیە، تا چەند موچە باش بێت و دۆخی خەڵكی باشتر بێت.

گوندی گەزنە دەكەوێتە سەر ڕێگای سەرەكی هەولێر ـ دهۆك، كەوتۆتە ناو ماستەرپلانی شاری هەولێر و نزیكە لە شەقامی 150 مەتری.