چوار پارکی گەورە لە هەولێر دروست دەکرێن

2024-09-07

ئومێد خۆشناو، پارێزگاری هەولێر لە پەڕی تایبەتی خۆی لە تۆڕی کۆمەڵایەتیی فەیسبووک بڵاویکردووەتەوە، چوار پارکی گەورە لە شاری هەولێر دروست دەکرێن. 
*پڕۆژەى دروستکردنى پارکێک لە کەنار شەقامى خێراى 150، بە گوژمەى  (3 ملیار و 700  ملیۆن دینار) لەسەر بودجەی نووسینگەی سەرۆکی حکومەتى هەرێمى کوردستان و لەسەر ڕووبەری 150ھەزار مەتری چوارگۆشە دروستکراوە. 
*پڕۆژەی سەوزکردنی یەکتربڕی شەقامی 120 مەتریی هەولێر لە ڕێگەی هەولێر- مووسڵ، بە گوژمەکەی زیاتر لە (3 ملیار و 420 ملیۆن دینار) لەسەر ڕووبەری 205 هەزار مەتر دەست بە دروستکردنى کراوە. 
*پڕۆژەى دروستکردنى پارکى ڕەشکین، کە بە گوژمەی (15 ملیار دینار) لەسەر بوودجەی تایبەتی نووسینگەى سەرۆکی حکومەتی هەرێمی کوردستان، لەسەر ڕووبەری نزیکەی 120 هەزار مەتر دووجا دەست بە جێبەجێکردنى کراوە. 
*پڕۆژەی دروستکردنی پارکی گەڕەکى ژیان، کە بە گوژمەى (1 ملیار و 40 ملیۆن و 477 هەزار دینار) لەسەر بوودجەى 15%ـى سەرۆکایەتیى شارەوانىی هەولێر لەسەر ڕووبەری (19 هەزار) مەتر دووجا دەست بە دروستکردنى کراوە.