کۆمپانیایەکی سعودی بە بەهای پێنج ملیار دۆلار وەبەرهێنان لە تورکیا دەکات

2024-10-01

کۆمپانیایەکی سعودی بە بەهای پێنج ملیار دۆلار وەبەرهێنان لە وڵاتی تورکیا دەکات و قەبارەی ساڵی ڕابردووی وەبەرهێنانی بیانی لە تورکیا بە ڕێژەی ١٧٪ زیادی کردووە.
جەودەت یەڵماز، جێگری سەرککۆماری تورکیا ڕایگەیاندووە؛ کۆمپانیایەکی سعودی دەیەوێت بە بەهای پێنج ملیار دۆلار لە بواری وزە و کەرتەکانی دیکەدا وەبەرهێنان لە تورکیا بکات.
جەختی لەوەش کردووەتەوە، بەپێی ڕاپرسییەکانی کۆمەڵەی وەبەرهێنەرانی نێودەوڵەتی، ژمارەی ئەو وەبەرهێنەرە نێودەوڵەتییانەی دەیانەوێت لە تورکیا وەبەرهێنان بکەن دوو هێندە زیادیان کردووە.
ژمارەی پڕۆژەکانی وەبەرهێنان لە تورکیا لە لایەن بیانییەکانەوە ساڵی ڕابردوو بە بەراورد لەگەڵ ٢٠٢٢لە سەدا ١٧زیادی کردووە و گەیشتووەتە ٣٢١ پرۆژە.  
لە لایەکی دیکەوە پەیوەندییە بازرگانییەکانی نێوان تورکیا و سعودییە بەردەوامن و قەبارەی بازرگانیی نێوان تورکیا و سعودییە ساڵی ڕابردوو گەیشتووەتە شەش ملیار و ٨٢٦ ملیۆن دۆلار.