ئاگرەکەی لۆس ئەنجلۆس ٤٠ ملیار دۆلاری خانووبەرەی خستە مەترسییەوە

2025-01-27

بەپێی ڕاپۆرتێکی نوێی تیمی توێژینەوەی ئابووری پێگەی  ڕییلتۆر ، ئاگرکەوتنەوە خۆڕسکەکانی ئەم دواییە لە ناوچەی لۆس ئەنجلۆس زیاتر لە 40 ملیار دۆلاری بەهای خانووبەرەی خستۆتە مەترسییەوە.

لەوەتەی ئاگرکەوتنەوەی خۆڕسکی ئیتۆن و پالیسایدس لە ٧ی یەک ی ٢٠٢٥ەوە  دەستیپێکردووە، سنوورەکانیان فراوانتر بووە و زیاتر لە ١٥ هەزار و ٨٠٠ موڵکی نیشتەجێبوون دەگرێتەوە، کە بەهای کۆی گشتییان ٤٠.٣ ملیار دۆلارە.

نرخی تێکڕای هەر خانوویەک لە سنوری ئاگرکەوتنەوەکە لە ناوچەی ئیتۆن بەهاکەی ١.٣ ملیۆن دۆلارە و بەهای تێکڕای خانوو لە ناوچەی پالیسادێس ٣ ملیۆن دۆلارە! تێكڕای نرخی لە ئێڵ ئەی کاونتی تا ڕادەیەک هەرزانترە و بۆ هەر خانوویەک ٨٧٠،٠٠٠ دۆلارە. جێی باسە مەرج نییە هەموو ماڵێک لە دەوری ئاگرەکاندا وێران بووبێت. هەروەها، پشکێکی بەرچاو لە کۆی بەهای موڵکەکان لە لۆس ئەنجلۆس لە خودی زەوییەکەدایە، واتە ماڵێک کە بۆ داروپەردوو کەمکراوەتەوە هێشتا دەتوانێت بە ملیۆنان دۆلار بفرۆشرێت بە پشتبەستن بە بەهای زەوییەکە تەنها.

تێچووی ئاوەدانکردنەوەی هەموو موڵکەکانی ناو دەوری ئاگرەکە، بە موڵکە بازرگانییەکانیشەوە، لەلایەن کۆمپانیای CoreLogic کیور لۆجیک،  بە زیاتر لە ١٣ ملیار دۆلار دەخەمڵێنرێت.

بەپێی ڕاپۆرتەکە نزیکەی ١٪ یی خانووەکانی نیشتەجێبوونی شارەکە سوتاون کە دەکاتە ٢٪ کۆی بەهای موڵکەکانی پارێزگاکە. لە شیکارییە نوێیەکەدا دەرکەوتووە کە تا ئێستا لە ساڵی ٢٠٢٥دا نزیکەی ١٠٠ خانوو لە سنووری ئاگرکەوتنەوەکانی ئیتۆن و پالیسایدسدا بۆ فرۆشتن خراونەتە لیستی فرۆشتنەوە.

لە ئێستاوە لۆس ئەنجلۆس تووشی کەمیی خانووبەرە بووە. لە نێوان ساڵانی ٢٠١٣ بۆ ٢٠٢٣، ناوچەکە نزیکەی ٢٩٠ هەزار ماڵی نوێی زیادکردووە، بەڵام خواست لەسەر خانووبەرە هەر بەرزبووە و ئەم ئاگرکەوتنەوەیە خواستەکەی بەرزترکردۆتەوە.

توێژینەوەکە ئاماژە بەوە دەکات کە ڕەنگە ئەو بۆشاییە فراوانتر بێت لەوەی کە داتاکان باسی دەکەن، چونکە سنوورداربوونی دابینکردنی خانووبەرە و تێچووی زۆری خانووبەرە بەهۆی ئاگرکەوتنەوەکە ڕێگری لە بونیادنانی ماڵە نوێیەکان دەکات.

بەهۆی سنورداریی مۆڵەتی بونیادنانی خانووبەرە لە شارەکەدا، هەمیشە نرخی خانووبەرە بۆ کڕین و بەکرێدان بەرزبووە. ئاوارەبوون بەهۆی ئاگرکەوتنەوە پێشبینی دەکرێت فشار بخاتە سەر کرێی خانوو

نرخی کرێ لە ناوچەی میترۆی لۆس ئەنجلۆس لە مانگی کانوونی دووەمدا لە ئێستاوە چوارەم بەرزترین ئاستی وڵاتەکەی بووە، لە دوای شاری نیویۆرک، بۆستن و سان خۆسێ، کالیفۆرنیا.

بە تێکڕا خانوویەکی دوو ژووری نرخی کرێی مانگانەی ٢٧٥٠ دۆلارە، بەراورد بە ساڵێک لەمەوبەر ٢.٧٪ دابەزیوە. ئەم دابەزینەش دەگەڕێتەوە بۆ بەرزکردنەوەی مۆڵەتی بونیادنان لەماوەی ئەو ساڵەدا.

ئەو خانوانەی کە لە چارەگی کۆتایی ٢٠٢٤ دا بەتاڵ بوون بەرزترین ئاستی تۆمارکردوە لەماوەی دە ساڵ دا  بۆ ٥.٩٪.