پێویستە ڕەحم بە هیچ کەسێک نەکرێت کە کاری عەقارات بەرەو عاقارێکی خراپ دەبات

2025-03-10

ئاشکرابوونی کەیسێکی دیکەی بردن و بەهەدەردانی پارەی هاووڵاتییان لە لایەن کۆمپانیایەکی عەقاراتەوە لە شاری هەولێر، جارێکی دیکە ئەو بازاڕەی شڵەژاندووە و کۆمەڵەی نێوەندگیری و ڕاوێژکاریی خانووبەرەش دەڵێت، پێویستە ڕەحم بە هیچ کەسێک نەکرێت کە کاری عەقارات بەرەو عاقارێکی خراپ دەبات.
ڕابەر وەرتی، جێگری سەرۆکی کۆمەڵەی نێوەندگیری و ڕاوێژکاریی خانووبەرە بە موڵک نیوزی ڕاگەیاند، بەهۆی نەبوونی سەندیکایەک یاخود شوێنێك کەوا خاوەنکارانی کڕین و فرۆشتنی خانووبەرە لە یەک نزیك بکاتەوە ئەو جۆروە کێشانە دروست بوونە و بوونەتە مایەی نیگەرانیی خاوەنکاری ڕاستی و ئەو پیشەیە بووەتە هۆیی ڕوودانی ئەو کارەساتانە.
وتیشی: "نەبوونی هیچ پێوەرێك یاخود بەخشینی مۆڵەت بەبێ هیج مەرجێك. هاووڵاتییان و حکومەتیش بەرپرسن لەم جۆرە کێشانە بۆیە پیویستە لەمەودوا ڕەحم بەهیچ کەسێك نەکرێت کەوا بیەوێت ئەم پیشەیە یاخود تێکدانی ئابووریی شاری هەولێر بەرەو ئاقارێکی خراپ ببات."
ناوبراو کە لە هەمان کاتدا خاوەنی کۆمپانیای عەقاراتی ڕابەر وەرتییە ئاماژەی بەوەش دا، هێشتا کێشەی زۆر زیاتر هەیە لەو پیشەیە و ناکرێت هەموویان بێدەنگ دانیشن و چاوەڕێ بکەن سەروەت و سامانی خەڵكی بە ئاسانی بەهەدەر بدرێت و هەر چەندڕۆژ جارێک ئەو هەواڵانەیان بەرگوێ بکەوێت.
"لێرەوە دەڵێم با هەموو ئەو کەسانەیی لەو پیشەیە کار دەکەن یەک بگرین تاوەکو بتوانین ڕێگر بین و ئەو ڕووداوانە چیتر دووبارە نەبنەوە، چونکە لە کۆتاییدا هەموومان زەرەرمەندین"، ئەوەش قسەی ڕابەر وەرتییە.