کەرتی خانووبەرە گرنگە و ناکرێت کارێک بکرێت متمانەی نەمێنێت

2025-03-10

ئاشکرابوونی کەیسێکی دیکەی بردن و بەهەدەردانی پارەی هاووڵاتییان لە لایەن کۆمپانیایەکی عەقاراتەوە لە شاری هەولێر، جارێکی دیکە ئەو بازاڕەی شڵەژاندووە و خاوەنی کۆمپانیایەکی عەقارات دەڵێت، کەرتی خانووبەرە گرنگە و ناکرێت کارێک بکرێت متمانەی کارەکە نەمێنێت.
بڕوا خۆشناو، خاوەنی کۆمپانیای عەقاراتی بناری خۆشناوەتی بە موڵک نیوزی ڕاگەیاند، نەشارەزایی کەسانێک کە هاتنە ناو کاری عەقارات و هەوڵدان بۆ زوو دەوڵەمەندبوون و مامەڵەی ناتەندروستی ڕیبا لە هۆکارەکانی بەهەدەردانی پارەی هاووڵاتییان لە کەرتی عەقاراتدا.
وتیشی: "دانانی پارە لای کۆمپانیاکانی عەقارات کارێکی هەڵەیە، چونکە عەقاراتەکان بانک نین و کە دەبێتە هۆی ئەوەی زووزوو گوێمان لێبێت فڵان کۆمپانیا چەندی برد و فڵانی دیکە چەند ملیۆن دۆلاری دیکەی خەڵکی خوارد."
ئەو پێیوایە کەرتی خانووبەرە کەرتێکی گرنگی هەموو کۆمەڵگایەکە، بۆیە ناکرێت ئەم کەرتە گرنگە ئەوەندە ناشیرین بکرێ و متمانەی نەمێنێ لەناو خەڵك بەهۆی کەمتەرخەمیی کۆمەڵە هەڵەیەك لەلایەن کەسانێکەوە.