ئەگەر ڕێگری لە پشێویی کاری عەقارات نەکرێت شتی خراپتر ڕوو دەدات

2025-03-10

ئاشکرابوونی کەیسێکی دیکەی بردن و بەهەدەردانی پارەی هاووڵاتییان لە لایەن کۆمپانیایەکی عەقاراتەوە لە شاری هەولێر، جارێکی دیکە ئەو بازاڕەی شڵەژاندووە و خاوەنی کۆمپانیایەکی عەقارات دەڵێت، ئەگەر ڕێگری لە پشێویی کاری عەقارات نەکرێت شتی خراپتر ڕوو دەدات.
بەختیار وڵاشی، خاوەنی کۆمپانیای عەقاراتی بەختیار وڵاشی بە موڵک نیوزی ڕاگەیاند، زۆربوونی عەقاراتی بێسەروبەر بەڕادەیەک هەر موڵكێک یان شوقەیەک عەقاراتێکی بۆ داندراوە، کە کەسانی ناشارەزا بەڕێوەیان دەبەن و دەیانەوێت لە شەو و ڕۆژێکدا ببنە ملیۆنێر لە هۆکارەکانی دروستبوونی بەهەدەردانی پارەی خەڵک و ناشیرینکردنی کاری عەقاراتن.
وتیشی: "پێویستە ئەو کەسانەی لە عەقاراتەکان وەردەگیرێن بە هەندێ فلتەری وەک ئاستی ڕۆشنبیری و باکگراوند و خوێندندا تێپەڕێت، هەروەها کەسانێکیش پەیدا بوون بەناوی دکتۆرا و ماستەرەوە کۆرسی کاری عەقارات دەڵێنەوە و باس لەوە دەکەن چۆن بتوانن بە پارەی هاووڵاتییان دەوڵەمەند ببن."
ناوبراو پێیوایە ئەگەر ڕێگریی لەو پشێوییەی کاری عەقارات نەکرێت شتی خراپتر ڕوو دەدات.